Комсомольски округӗнчи Вӑрманхӗрри Чурачӑк ялӗнче карантин тесе палӑртнӑ. Ку – тилӗ виллине пула.
Ӑна экспертизӑна панӑ, унти специалистсем тилӗ урнӑ чирпе чирлӗ пулнине ҫирӗплетнӗ.
Ветеринарсем чир ан сарӑлтӑр тесе выльӑх-чӗрлӗхе вакцинаци тӑваҫҫӗ. Халӗ ялта чӗрчунсемпе ҫыхӑннӑ ярмӑрккӑсем ирттерме, суту-илӳ тума икӗ уйӑх юрамасть.
Чӑваш Республикипе ӗҫлекен Россельхознадзор управленийӗ хыпарланӑ тӑрӑх, «Центр» ТМЯП ӗҫӗнче кӑлтӑксем тупнӑ.
Аса илтеретпӗр, нарӑсӑн 4-мӗшӗнче Кӳкеҫ лицейӗнче ачасем наркӑмӑшланнӑ: пӗрине пульницӑна хунӑ, ултӑ ачан килте сипленме тивнӗ. Лицейри ачасене вӗри апатпа «Центр» ТМЯП тивӗҫтерни паллӑ.
Ҫакӑн хыҫҫӑн тӗрӗслев органӗсем хӑйӗн ӗҫне пуҫӑннӑ. Чӑваш Республикипе ӗҫлекен Россельхознадзор управленийӗ «Меркурий» ФГУП урлӑ иртекен электронлӑ хутсене тӗрӗсленӗ те 2025 ҫулхи кӑрлачӑн 13-мӗшпе 20-мӗшӗнче Кӳкеҫри лицея 177 килограмм аш кӳрсе килнине (ӑна Комсомольски тӑрӑхӗнчи Зарифзянов И.Р. фермер хуҫалӑхӗнче туса илнӗ, Соловьев Н.М. усламҫӑ тирпейленӗ) асӑрханӑ. Ку аша «Proteus йӑхӗнчи бактерисем» кӑтарту тӗлӗшӗнчен тӗрӗслемен иккен.
Ҫапла май, апат-ҫимӗҫпе тивӗҫтерекен «Апат-ҫимӗҫ продукцийӗн хӑрушсӑрлӑхӗ» техника регламенчӗ ыйтнине пурнӑҫламан. Ҫакӑншӑн айӑплисен явап тытма тивӗ.
Комсомольски округӗнчи Чурачӑк ялӗнче пурӑнакан Петрпа Зинаида Герасимовсем ылтӑн туйне паллӑ тунӑ. Петр Исаевич шкул хыҫҫӑн Казахстанра тракториста вӗреннӗ, яла таврӑнсан «Заветы Ильича» колхозра вӑй хунӑ. Кайран чылай вӑхӑт почта уйрӑмӗнче водительте тӑрӑшнӑ, тивӗҫлӗ канӑва тухсан Комсомольскинчи вӑрман хуҫалӑхӗнче тӑрӑшнӑ.
Зинаида Михайловна Ҫӗнӗ Выҫли ялӗнче ҫуралнӑ. Шкул хыҫҫӑн «Дружба» колхозра вӑй хунӑ, кайран – строительство организацийӗнче штукатур-малярта. Шӑпах ҫавӑнта паллашнӑ вӑл пулас упӑшкипе. Пӗрлешнӗ хыҫҫӑн мӑшӑр Комсомольскинче тӗпленнӗ.
Герасимовсем виҫӗ хӗр ҫуратса ӳстернӗ. Халӗ вӗсен – 11 мӑнук, 2 кӗҫӗн мӑнук.
Кӑрлач уйӑхӗн 14-мӗшӗнче Россельхознадзорӑн Чӑваш Енри тата Чӗмпӗр облаҫӗнчи упрравленийӗн ӗҫченӗсем ПАИ инспекторӗсемпе пӗрле Комсомольски округӗнче пӗр машинӑна тӗрӗсленӗ. Унта мӑйракаллӑ шултра выльӑх пулнӑ.
Тӗрӗслев хыҫҫӑн 5 выльӑха Тутарстанрн Патӑрьеле илсе кайма тухни, вӗсен маркировка пулманни ҫиеле тухнӑ. Ветеринари докуменчӗсем те пулман.
Специалистсем ҫав ҫынна выльӑха харпӑр хуҫалӑха карантина хупма ыйтнӑ.
Вӗсем 50 ҫул пӗрле пурӑнаҫҫӗ. Халӗ те хитре, ӑслӑ, телейлӗ...Комсомольски округӗнче пурӑнакан Николайпа Зинаида Андреевсем ылтӑн туйне, паллӑ тунӑ.
50 ҫул килӗштерсе пурӑнакан мӑшӑра Комсомольски округӗн пуҫлӑхӗ Николай Раськин та саламланӑ,вӗсене ӑнӑҫу, тата нумай ҫул килӗштерсе пурӑнма ӑнӑҫу суннӑ.
Комсомольски округӗнчи Аслӑ Ҫӗрпӳелти культура ҫуртӗнче путвалта раштавӑн 15-мӗшӗнче 19 сехет те 40 минутра арҫын виллине тупнӑ. Ун ҫине кирпӗч стена ӳкнӗ. Арҫын 1966 ҫулта ҫуралнӑскер пулнӑ.
Район прокуратури вырӑнта тӗрӗслев ирттерет. Кун хыҫҫӑн ӗҫ хӑрушсӑрлӑхӗн йӗркине мӗнле пӑхӑннине хак парӗҫ.
Палӑртмалла: хальхи вӑхӑтра ҫак культура ҫуртӗнче «Импульс» тулли мар яваплӑ общество тӗплӗ юсав ирттерет.
Чӳк уйӑхӗн 12-мӗшӗнче Чӑваш наци музейӗнче республикӑн Культура, национальноҫсен ӗҫӗсен, архив ӗҫӗн министерствин коллегийӗн ларӑвӗ иртнӗ.
Мероприятие коллеги членӗсем, министерствӑн структура подразделенийӗсен ертӳҫисем, районсемпе хуласен администрацийӗсен культура пайӗсен пуҫлӑхӗсем хутшӑннӑ. Ларӑва культура министрӗ Светлана Каликова уҫнӑ.
Вӑл «Чӑваш Республикин культурӑн тава тивӗҫлӗ ӗҫченӗ» ята тивӗҫнисене саламланӑ. Ҫав йыша — Шупашкар муниципаллӑ округӗн Тӗп культура центрӗн хормейстерӗ Наталия Арсентьева; Шупашкарти «Ҫӗнтерӳ» мемориал комплексӗн «Ветеран» халӑх хорӗн хормейстерӗ Светлана Муллина; Комсомольски округӗнчи тӗп клуб тытӑмӗн халӑх театрӗн режиссёрӗ Марина Шумилкина.
Чӑваш патшалӑх культурӑпа ӳнер институтӗнче Сергей Казаковӑн пултарулӑх каҫӗ иртнӗ. Ӑна асӑннӑ шкулӑн преподавателӗн юбилейне халалланӑ.
Юбилей каҫӗнче юрӑ-кӗвӗ янӑранӑ, ура ҫапса ташланӑ.
«Жизнь в ритме» ят панӑ концерта пухӑннисем – институт ертӳҫисем тата Каҫал тӑрӑхӗнчи ентешӗсем юбиляра чунтан саламланӑ.
Ҫак кунсенче Шупашкарта Чӑваш халӑх поэчӗн Валери Туркайӑн икӗ чӗлхеллӗ ҫӗнӗ кӗнеки кун ҫути курнӑ. Вӑл «Парнелӗр салтака чечек. Дарите цветы солдату» ятлӑ.
Кӗнеке пӗтӗмпех Ятарлӑ ҫар операцине тата патриотизм темине халалланӑ сӑвӑсенчен тӑрать. Чӑваш поэчӗн ҫак кӗнекене кӗнӗ сӑввисен пӗр пайне вырӑсла Владимир Грибанов (Чӑваш Ен), Николай Михин (Питӗр) тата Юрий Щербаков (Аҫтӑрхан) куҫарнӑ.
Ҫӗнӗ кӗнекен «На войне многим хочется читать стихи» ятлӑ умсӑмахне пирӗн мухтавлӑ ентешӗмӗр, Раҫҫей Паттӑрӗ Николай Гаврилов генерал-лейтенант ҫырнӑ.
Валери Туркай хӑйӗн ҫӗнӗ кӗнекин ытларах пайне ятарлӑ ҫар операцийӗнче ҫапӑҫакан паттӑр ентешӗсене парнелеме палӑртать. Кӑҫалхи юпа уйӑхӗн 21-мӗшӗнче поэтӑн Комсомольски районӗнчи Хырай Ӗнелте пурӑнакан хастар ентешӗсем «Парнелӗр салтака чечек. Дарите цветы солдату» кӗнекене, ытти гуманитари пулӑшӗвӗпе пӗрле, Запорожье тӑрӑхне илсе кайнӑ та ӗнтӗ.
Валери Туркайӑн ҫак пӗртте ансат мар саманара пурне те питӗ кирлӗ кӗнекине вулакан патне ҫитерме Чӑваш Енре тата Мускавра пурӑнакан Раҫҫейӗн чӑн-чӑн патриочӗсем пулӑшнӑ.
Чӑваш Енри водитель «Чи лайӑх грузовик водителӗ» конкурсра иккӗмӗш вырӑн йышӑннӑ. Ӑмӑрту Грозный хулинче авӑн уйӑхӗн 25-27-мӗшӗсенче иртнӗ.
Унта пирӗн ентеш Александр Анисимов хутшӑннӑ. Вӑл – Комсмольски тӑрӑхӗнчен, руль умӗнче 19 ҫул ларать, «СпецТранс» организацире ӗҫлет. Александр конкурсра 92 балл пухса иккӗмӗш вырӑн йышӑннӑ. Ҫапла вӑл 150 пин тенкӗлӗх сертификата тивӗҫнӗ.
+0.3 °C